A•chik chatro-chatrirangni SSLC/HSSLC porikanina chanchisamsoani:

Toromo gisik nangani nambea, gilja re•a aro Isolo bi•a, uandakgipa bewalrang gamchatbea. Songsalo bak ra•ani, noksul, songsul aro mahariko dakchakani nambea. Christmas aro bilsi gital-ko maniani aro chrokani nambea. Chadambe ong•e sobharangchi re•e bak ra•aniba nambea. Bia alani aro  nokchame kaa, uarango kam dakchakaniba nambea. Indiba mingsa chanchina nangani. Da•o dipate bang•a A•chik chatro chatrirangan (gimiko aganja), SSLC ba HSSLC senagiparang, december ja a•bachengaoni january aro february-ni skanggipa antirangona lekkako dangtapgijagipa bang•bata gita nikmana. Maini a•selo ong•a niatora, angni chanchianio aro nikanio aditarangko ong•na krae nika:

December-onin bang•a bi•sarangan Christmas-na tarisoa, Christmas-o agrepil•e chroka, bilsi gitalo chrokmesaduga•a, bachiba bachiba rorampreta, saniba bia alanirangna kamo dakchakpreta, sobharangchi dongkama, aro uandakgiparang. Indake uarango bak ra•paengon march jao porika donggipanade namrengare galchipe donchenga gita daktoka. Bang•an december aro january-ode lekkakon a•dimosa nangatbatronga. Jagnikode indin poraigija uachi-uachi re•ruraean, uko-uko dakarin chatro-chatri ong•e dakna nangchongmotgipakode gualska•a. Ua jarango, dingtang dingtang programrango agre bak ra•paani a•sel poraiani gisikode bringbring-brangbrang ong•atskaa aro gisikrangko tom•tom ong•atja. 

Indaken christmas-o, bilsi gitalo, saniba bia alanio aro sobharango agre kusi ong•timmakarin, poraianikode noksikosa jagninade donchengaria. February-osa noksikni lekkako kolame, a•dimuko dokpronge bang•an a•bachengronga. February-o a•bachengon jasasan porikana dongkua, aro subject 6-ko porainade dandudakdak ong•skaaha aro jagnirangna dangtapgija donnani gimin, poraigiminkoba gualpil•aiaha. Khasi Hills-ni chadamberang aro Garo Hills-ni gipin jatrangde decemberoni, january aro february-ona jagittam bimchipe poraitokbatgipan bang•bata. Indiba A•chikrang...? Bang•bata A•chikrangan jasa february-osan poraibatokaria. Jagittam aro jasa tosusa•ato, aiao, namen dingtanggrikbea.

Ia jagni jako poraigija indin re•ataniba, aditarangoni mingsa, A•chikrangni nambata pass percentage-o pass ka•aniko salongipa ong•a.

Uni gimin, je chatro-chatrirangan march jao porika sena nanga, uamangde christmas aro bilsi gitalo agre rorama aro chrokmesa•aoniko, an•tangko champengo nambatgenchim.  Sobharangchi dongkamja•o  aro salanti bak ra•jaoan nambatgenchimkon. Bia alani kamrango agre bak ra•jaoan nambatgenkon. Christmas-o nobinana re•angode gilja jokmane joljol noktangona re•baoan, ba Christmas-o Dec. 24 aro 25-o gilja re•enba kusi ong•an chu•ongnawachimkon. Bilsi gitaloba batbegipa dec.31, 1jan. aro 2jan.rango kusi ong•an chu•ongaigenkon. Bia alanioba agre kamrango bak ra•aniko komiato namnawachimkon. Sobharangchi re•e dongkamja•on nambatnawakon, aro sobhani bon•kamgipa sal robibarangosan re•ange bak ra•omangba, Dakgipa Rugipara kusi ong•batgenchimkon. Agre chrokmesa•ana batede ia Christmas-o, bilsi gitalo, bia alanio aro sobharango kra•a gita bi•anio bak ra•panioan Dakgipa Rugipara kusi ong•batgenkon.

Gisiko so•so jeng•jeng ong•ato, tom•tom atchonganiko dongtoatja. Uni gimin ua jagittamni somoirango tom•tom kra•a gita somoirangko jakkalenba, kra•a gita ripengrangmingba roenba, name bimchipbee march jani do•gani talako kulina, name chabiko ripingso•ode nambatgenchim. Iako dakataniara, chu•batgiparang aro ma•a parangni mikrakani kamba ong•a. Chadamde ong•e, chadambede skatang roramna aro somoiko jakkalwengwatna sikaria. Uko dimbrengatna aro poraianio somoiko jakkalbatatnade chu•batgiparangni kamoan.

---------------------------

Minggipin uni segiminrang:
1. Ma•ani mikchi - Rokkom gittam donga
2. Raka - Maikai tota
3. A•chik ku•o chanbewal
4. Wa•a rokkomrang: Garo-hills-adoko man•giparang
5. Rongtalgijakode namnikbrujana
6. Chakkol ong•ja dakchakgipa

7. Sarong - A•chik jatni kal•ani