A•ba rama nokdringna

Nang a•ba ramako na•an re•ja ong•ode,

Samsi samjil dikpripe, ramao ru•at bang•gene.

Na•an re•na kenode, dagram ong•nok a•bade,

Mi, misi aro silbagipa biterangko matburungha cha•nokne.

Nang nokni ramako na•an gelpile re•ode,

Samsi ja•gam cham•gipa, ja•gam gimanawane.

Na•an re•rongjaode, raman burung pil•nokde,

Nitogipa nokdringko jong•mot cha•toknajokne.

Anti rama dilsako, songni tarina tikkelja•ode,
Na•kam merong karina, rama cholna brangnawane.

Songni jinma ku•monge, ku•rang on•jaengode,

Sa bachani re•bae, songna asie on•epanane?

An•tang nokdring te•sako, an•tang otrokna nangnawa,

A•ba rama samsiko o•trangjolosa nampara.
Songni ramatangna, kingkot tikkelosa namnawa,

Dringtang rama cholsako, ka•dongjringe re•osa nampara.

Na•songni anti ramako, songgipin re•pajanawa,

Nang a•ba totsako, sawa dange ronara?

Nang dring te•sako, sakgipin kagepejawa,

Dringtangko silatna, jakmatangkon nangpara.

Mongma matcha bang•oba, aro randingba•oba,

Chima wari dal•baoba, chipu malba•engoba,

Rama samte dikoba, nokking wa•jak seloba,

Buditangko jakkale, krangdingatna nangnawa.

***   ***   ***   ***