Wa•a Rokkomrang - Garo Hills A•doko man•giparang

Wa∙a, mandeni salantio daka kamrango mingsa  nambegipa aro gamchatbegipa ong•a. Wa•ani gamchataniko chanchiaton, wa•a maiana cholija, gimiknan cholia, inesa an•tangni gisikonade na•baaria. Ja•diloni, bipangoni aro bijakona; me•a nadoba•aoni, wa•ringoni aro wa•gipeona; ja•dil - atte gitchi bipongna aro gipinrangna; me•a – cha•anina, wa•ring – wa•ding ba du•ana, rokkomari wata chenganina aro kaa wennanina, wa•ring – karichi ba kalchi, song•e channe cha•anina; chidare aro silpong dake jakkalanina; wa•sing brengna aro tokkol tarianina; bagan bera  ba guare kana; manggot, gol•dik aro jonggalrangna.... Bijak – nokking pinna aro matchu mattena cha•aninaba... Nok rikanio rokkomari nokni bakrangna aro rikna jakkalanina wa•akon jakkalbata. Wa•si, chikrok, du•a, wa•jak aro rokkomarirangna. Mande wa•ako maiarangna jakkala uarangko setokna chanchiode,  aiao! dontongnan changjawakon... 

Ia kan•dikbegipa seanio, wa•ako mairangna jakkala uako ning•tue sena iano mangsongja, indiba Garo Hills-o wa•ani rokkomrang baditarang donga,  iakosan janapnasan namnikbea. Garo Hills-o man•gipa rokkomrangko segenchimoba, iano janapanio mittamrangko mingchangnaba donga, maina iako seanio jol ge•sanno man•gipakosa janapa gitasan ong•aienga. Ia wa•ani rokkomrangni bimungrangkoba jolsanni minganiosan bimungko janapaiaha. Jolsa•o minggipa apsan rokkomkon Garo Hills-ni jolgipinno minggipin bimungrangoba mingani donga. Uni gimin iano janapgipa bimungrang, jolgipinno bimung  mingani baksa apsanjanaba donga. Iano bimung segatgimin, Ranggira Babadam joloni minga gitasa seaha. Jeba ong•bo bimung mingani rokkomna bate, Garo Hills-o man•gipa wa•a badita rokkomrang donga, uakosa uianiona ra•bana nangchongmotbatani. Joljol hai, wa•ani rokkomrangko niangna. 

Angni iano segatgiminrang, wa•a ming 14 rokkomrang Garo Hills-o donga. Uarangara:

1. Wa•tre / wa•mande

2. Wa•tibok wa•naru (wa•tibok dal•gipa)

3. Wa•tibok (wa•tibok chongipa rokkomko wa•tibok innen mingaria)

4. Seksra (wa•gi gita dakanga)

5. Burua...

6. Wa•gi (A•tila amuna, wa•gikosan jakkalbata)

7. Wa•kanta...

8. Wa•dru (wa•arangoni dokrubatgipa ong•a)

9. Wa•nok (wa•nok chongipako wa•nok innen mingaria)

10. Wa•nok wa•sim (wa•nok dal•kalgipa)

11. Wa•nok wa•da (wa•nok jatoni dal•batgipa)

12. Wa•sit (Wa•site mesaka)

13. Wa•mina (Iade chonbea, Balpakram jolrangosan man•bata)

14. Wal•ni (Skang chengo wa•al so•bakna ba chaatna jakkalbata, gipin wa•arangna bate, wal•niko salo ta•rakbate wa•al chaningbata)

Ia rokkom 14-kosan Garo Hills-o man•a ine anga chanchija. Haida gipin jolrango, minggipin rokkomrangkoba man•engnaba donga. Ia segatani jol ge•sanno pangchakesa seani gimin, galchanganiba dongnaba donga ine anga chanchia. Jeba ong•bo, ia wa•ani rokkomrangni bimang aro maiarangna jakkalbata, uarangko anga minggipino talatskana mangsonga.

[Suggestions ka•dapna / feedback on•a namnikgiparangko katchabee rimchaksoa...]

...
Minggipin uni segiminrang:
1. Ma•ani mikchi - Rokkom gittam donga
2. Raka - Maikai tota
3. A•chik ku•o chanbewal
4. Rongtalgijakode namnikbrujana
5. Chakkol ong•ja dakchakgipa
6. Sarong - A•chik jatni kal•ani