Chakkol ong·ja Dakchakgipa

Ø  Chakkol, rakkol, cha·parikgipa, nomil, ba pante aro je kattaoba mingbo, uandakgipa kattarangchi okamaniara krabreja. Uamang man·e cha·kalgipa aro cholikal·gipao donga aro uamangni (nok nokgipani) kamrangko ritchengata. Uan cholikal·gipa mandena mairongpil·e katcha·ani ong·a. Chakkol inne uamangko dugapil·e mingsani ja·man minggipin kamko ka·ataniara; aro nok nokgipani manderang bang·a changon chonna remma kamrangkoba (domestic chores-ko) ka·rongbregijaniara ka·tong grianiko mesoka.

 

Ø  Bi·satangko nangchongmotgipa kamo, jekai su·srangani, chonchonnako aro nata sol·aniko dangtapnan bang·an detangkode on·rongja. Bi·satangko kutoritangko, sa·ra aro bilsokani kri chongipa ba·ra cholatangkoba su·srangnaan on·rongja, skija aro didija. Uandakako man·gipa dedrang, rongtalatna sapjawa indiba mitchirakgipa ong·skaronga. Uamangko porainasan skia aro song∙ani ritanikoba bi∙satangko bang∙a choligipa ma∙a paarangan champenga. Uandake dakaniara ma∙ni paani bi∙satangna andalao ka∙saaniko mesoka. Uan tusianio detangko namgijagipa bewalona nikna amgijanio ramako pue on∙na. Ua choligipa de, bebegita poraia dal∙angoba songsalna jakkaltobegipa ong∙rongjawa; aro uichakani gisik dongbrejawa. Saksa sakgnisan chonna remma kamo neng∙skimani aro gitchianiko ma∙sigen. Bang∙an chongipa kamko ka∙e rongtal an∙talatgipako mande ra∙na changjawa. Uni gimin gisepo dakchakgipako dakchakchina didiani nambea. Detangko gipin kamko ka∙atgija, poraimangmangchina didianiara gualani kam ong∙a.

 

Ø  Bebean bang∙a choligiparang, kattamangmangchi mande ra∙china aganna indiba kamchi aro bewalchi noko dakchakgipako mande ra∙na changrongbreja. Nokdangni dal∙drobagipa dedrangba, rimrim noko dakchakgipanasa plates-baterangko jinnongronga aro galgoprongbata. Arey! Chonna remma rongtalatanikode nokni dedrangniba dangtapani nangchongmotgipa kam ong∙achimba. Bidana ka∙oksianiara, poraianiara lekkamangmangoniko skie ra∙anisan ong∙ja aro jak sra∙aniko skie ra∙ani ong∙a. Poraia skianiara chanchiani, katta ku∙atani aro daka kam cholon-bewal gimikkon dake skiera∙anisa ong∙a. Detangko nokni sa∙ra nokkrako otrokatani, me∙dik sam∙dikrangko natatani aro chola ba∙ratangko su∙srangchina (domestic chores) didianiara, detangna ka∙sagijani ong∙jachim.

 

Ø  Choligipa mande dakchakaniko nangesa, cholikal∙gijagipa mandeko nange am∙ronga. Uni gimin ua nang∙ni noko donggipa chakkol ba rakkol ong∙ja; indiba nang∙ni nokko aro nokdangni mande sakprakkon dakchakgipasa. Ua nang noko donggipaban dakchakaniko nanggipa ong∙a indiba ua dongparikgipa ba cha∙parikgipa ong∙ja aro ua nang∙ko DAKCHAKGIPA ong∙a. Ua dakchakgipa dongjagenchimode nang∙ni nokdangni kamrang jrebata. Uni gimin, ua nang nokdangni gamrangko chilchakgipa aro ritchengatgipa ong∙a. Rakkol aro chakkol, ia katta onne aganjagenchimoba, bang∙an onnatanio jakkalbata. Uni gimin uko onnate agannaming apsannaia.

 

Ø  Man∙eba cha∙bo kangalba ong∙bo, chonna remma kamrangko rim∙china ma∙a paa dedrang sakprakon skina nanga. Dedrang noko dakchakgipako dakchakna nangchongmota. Dedrangko nokni raja aro rani ong∙china ritimna cholko on∙a nangja. Dedrangko maha-maha dongate, chonna remma kamna kang∙kare kom∙atgijaniara, detangko namgija∙aniona aro sakgipinko mande ra∙gijaniona dilanisan ong∙a.

 

Ø  Uni gimin noko dongpagipa rakkol ong∙ja. Ua nang∙ko dakchakgipasa. Uni dakchakanina nok nokgipa dakchakna nangska∙aniara, dakna nanggni kam ong∙skaa. Dakchakgipako tangkachisan dakchakska∙ani ong∙ja. Tangkachi dakchakaniara bang∙a dakchakani cholrangoni, rokkomsasan ong∙a. Uamangko dakchakska∙anide, uamangni gisikko, ka∙tongko aro uamangni kamkoba ritchengatska∙anisa ong∙a. Ua dakchakgipa dambe ong∙genchimode maiba skie ra∙dapani cholko uamangnaba mesokjolani aro kulie on∙anian nok nokgipani nambegipa gun ong∙a. Noko dakchakna rakkion, uko poraiatna ba maiba janggi tangani cholkoba mesokna nangchongmota.