Jat, sao ding•o soka chakani bewalko, aditako bodilena nangenga

On•titi phone-o golpochengani ong•a obosta:

Anga: Hello, sawachim...? Mainaba ka•atachim? Da•sio anga nikrikjaha...

Unknown: Angaha... Number gital tarieha, ka•e niataiachim.

Anga: Sawa anga...? Oh.... Pajong, a•tilani kamal... Ku•rango ma•siatengjok. Namengama pajong?

Pajong: Aam, namonga•inba. Buchumaha jomonga...

Anga: Hospital-chi re•ange sannengakonba... Basakonisa saenga?

Pajong: Jaha ong•na ham•pilongahajok... Hospital ra•angaming, watetpil•aha mni antionin.

Anga: Namkalakuha watetahakonba... 

Pajong: Namkujaming... Am da•udi namangkal•ongjokin... Indiba mal mattaha bon•biongjok sagipamingna baksa...

[Anga, jatni sokachakbewalko,  mongsongbate sao-ding•o aro sia katani somoio dakani bewalko bodileaniko nangnikenggipa, aro on•titi obostarangko chimongenggipa, chimonganiona baridapatna mangsonge aro suk ong•jae sing•ataiaha...)

Anga: Badita wak, matchu aro do•orang bon•engaha...?

Pajong: Masu mangha, wak manggni aro du•di batda mang•in hong•ongginok... Ma•manpiljaha?

(Golpoani re•angkua....)

Niatbu, chonnaba ba dal•aba ong•bu,, masu manghani dam; wak manghani dam aro du•u rokkal (local/dc)-ni dam... Aiao! Namen chanchina nangbeani, mikaoe niani...

Beben duk ong•chake ka•dimeatna sokbagipana cha•na ringna sachiani namchongmota, indiba be•en bitinchi ong•gija, me•su samjakona bodilena man•jawama. Jatni song•a ritanio, me•suchiba toa nama bi•jakrang bang•beachim. Noknokgipa nokdango saani gimin duk ong•a, aro uamingna baksana sokachakani korosnaba sko rim•dapna nangenga. Noknokgipa ong•e, dukoba, an•tangni man•ao namao sachina sikbea. Sawa sokbagipako migri watatna ska? Ia dukni somoio, be•en bitinchi soka jakjachina didiani aro beng•anide sokbagiparangni aro uigiparangni jakosa. 

Dakbewalni bidingo, be•en bitinchian soka chakna dra•anio ga•akaienga... Anga saksako nikaha, be•en ingipachi soka chakna sikjachim, indiba bilgri ong•skaenga: “Bisongba angming baksa duk ong•rimean, duk ong•pana nina re•bajok. Maina masuko dokgen. Na•kam chirara, aro dal chibongbangakuba cha•i hi•angarongkanjokai. Mitelbijok nina ri•baanina, ka•dimeatanina. Namnamachi soka chakna man•jae dukde ong•a angaba”. Indiba ua mandeko topgrime inska•aha, “Amikkani, alakside te•akol ting•pilasai... Maharirangna, sokbagipana, wak masu dokna•in alaksitek...”. Ian dakbewal..., jean dukni kosako koros bon•angani. Arey! Be•enchi soka chakaniko nangnikode, be•en bimang an•semg baljokani somoio rona re•angboba... Jeoba, jekoba bodileanide altuanide ong•bebeja.

Saoba aganskara, “Songadamode indakaia...”. Indiba niwilwalatode, “Town-jillaoba apsan ong•enga. Beben matchu den•ja, wak dokja aro do•o rasotja, indiba bajalniko breenba be•enchin soka chaka. Maia dingtanggrika iara?” 

Saaniko sannanina koros bon•ana batede, soka chakanio koros bon•batenga, bang•bata manderangan ia obosta•osa ong•rongbatenga. Maharini, ripengni saanio, nina re•ani bewal namchongmota aro ia bewalko dakangkuna nanga, indiba soka chakani bewalko bodilena nangchongmotenga.

---------------------------

Minggipin uni segiminrang:
1. Ma•ani mikchi - Rokkom gittam donga
2. Raka - Maikai tota
3. A•chik ku•o chanbewal
4. Wa•a rokkomrang: Garo-hills-adoko man•giparang
5. Rongtalgijakode namnikbrujana
6. Chakkol ong•ja dakchakgipa
7. Sarong - A•chik jatni kal•ani