Maini a•sel, nokdangoninma?

• Da•ororo adita manderangni skatang mande sakgipinko bal•ekani bariroroenga gita nikmannenga. Ua je kam aro a•seloba re•chakatbo, ua mandeko mandean ra•rongbrejaengaha. Saoba aganna, ‘Uarangara ka•dinganinasan’. Ka•dinganinara rokkomari nama bewal aro gadangrang bang•achimde. Ka•dinganioba man rakkiani dongachim. Angni chonmitingode, an•tangna chu•batgiparangkode kra•aniomangba skatang bal•ekchakjachimde, ‘Kreta ba mande ra•anio dongaiachimde'.

• Da•oara saoba dilgiparangko aro saoba film kal•gipani noksa bimangrangko sostasa man•skaengaha. Politicians-rang sakprakni nanggnikako dakna amjagenchimoba ba nambee kakkete re•na man•jagenchimoba, uamangni man dongachimde. Bang•a dilgiparangan namna krengani donga. A•songko chalaigipa gri, a•song bringbring brangbrang ong•chongmotgen. Uamang namjagenchimode, namdapatna na•a kang•kare kaenba re•chakatboda. Namnikbo namnikjabo kal•stape katta skatang agannani namjabea.

• Chasong gital oe, digitalni chasong... Indiba mande ra•ani aro man rakkianiba dongaba. Mande ra•ani aro man rakkianide chasong gimikoan an•chi dongkamaba. Nikna man•enga A•chikrangni dal•dalgipa dilgiparangko jekai Pa. Purno Sangma, Pa. Mukul Sangma, Pa. Conrad Sangma, aro gipinrangkoba robolna baten mande ra•jaenga. Robolkon bretna kennenba name kal•kua aro jakkalkua. Ua dilgiparangde robolna baten gamchatachimde. 

• Da•o minggipin nikna man•enggipara, Te. Saldorik, Tra. Mikkimchisa/Mikkachi aro gipinrangkoba, uamangni noksarangko/photorangko jakkale skatang kattarang aro memes-rangosa chonniktoke bal•ektoke rotokaia. Mitamrang chonnike bal•eka, mitamrang ka•dingna bal•eka aro mitamrang mikbue bal•eka. Chonnikgija bal•ekomangba kattarangko chanchie nipabo, uarang nambeamare. Uamangni manba dongpa•ake. Bal•ekengon sakgipinni juttakoba ganne nipabore. 

• Chonnika man•giparangna: Nang•ni dakenggipa namode aro namenga ine nikode, da•a dontonga. Miksonganio tongtong ja•ku de•angkubo. Chonnikgipade dongtelaria, darangan a•gimikni namnikakode dakna amja. Jegitaba namako dakbo, namja ine jegipade dongaia.

• Name nikja aro krajare, skatang katta ku•sikni gam•ana bokbokode aro changa sapatangna(creativity) jeko jako skatang tarie mesokataiode. Man rakkiani aro mande ra•anian gamchatbatare.

• Name ja•pang ja•dilko niatode, iandakgipa katta agannanirang nokdangonin a•bachengani ong•akon. Chonmitingonin mande skako man dongija aro mande ra•gija bal•ekaniko champengja•ani ong•engakon. Mitamrang ma•a pakoba mande ra•ja. Abitangkon rakpangpilaria.