Easter Monday: Maia bewalo cha•rimenga?

• Re•baenggipa Robibar(21st April, 2019) Chakatpil•ani robibar ba Easter Sunday ong•a. Ian Kristianrangni dal•batgipa maniani aro bebera•ani ja•pang ong•a. Jisu jokatgipa Isolni depante, mande jatko jokatna mande pil•e atchiaha innomangba ong•gramaigenchim. Sawa a•gilsako atchija, aro skangni chasongo namgijagipa mande kracha•begipa bewalo so•otako man•rongachim. Uarang Jisu Isolni depante chisolo so•otako man•aniara, Jisuko namgijagipa innen chanchiaigenchim. Indiba salgittamni ja•mano, siaoni chakatpil•anisa uni chong•mot Isol ong•ani aro jokatgipa ong•aniko sakki on•aha. Jisu siaoni chakatpil•jaode, Kristianrangni bebera•ani ong•grammaigenchim.

• Ia Kristianni dal•batgipa bebera•ani ja•pangara mandeni ga•aktelaoni salantio Jisu Kristo-o, tanggipa chakatpil•anio an•ching sakprakkon chakatpil•china namaona an•pilanina chol ong•a. An•ching salantian an•chingni namgijaoni chakatpil•na krengna nanga.

• Ia chakatpil•ani kario, kusi ong•e katcha•anina ka•sroke nokdangni gita ba chadambeni dol gita, ba ripengskarang baksa damsan cha•rimaniko (Easter Monday salo) A•chik a•songo dakrongba•enga, ian nambegipa dakbewal ong•a. Ga•akgiminoni aro janggini sigiminnoni chakatpil•anio katcha•ani nambea.

• Indiba mingsa chanchina nangbeani: Ia damsan cha•rimaniara maia bewalo ong•enga? Ia Easter Monday-o damsan cha•rimaniara an•tangni janggina, ma•a paana, nokdangna, dedrangna aro songsalna neng•nikaniko on•engama on•jaenga. An•ching ua sombar salko, Isolni namnikanio kra•a bewalo re•atengama? Chanchina nangani.

• Chu-ara namama namja? Chu nambegipa ong•a, indiba bang•an chuni nokkolosa ong•ronga. Iani bidingo chuara namgijagipa ong•a ine aganrongbata. Na•a chuni nokkol ong•jagenchimode aro na•a chuko rongtale jakkalna man•ode namachim. Indiba chengoni obostarangko nipilaton, bang•an chuko sason ka•na man•ja aro chuni nokkolsa ong•batrongskaa. Uni gimin, mandeni bilgriani a•selo 'chu ringani pap ong•a' ine aganronga, maina chu papona dilrongbata aro bang•an chuo ga•akaha. Uni gimin chuko ringjana man•on nambatbea. 'Chu namgipa ong•a. Chu ringani pap ong•ja indiba chuo pekanisa pap ong•a'. Peka ine agannengon chu ringe pekamangmangkosan mangsongja, chu ringanio chuo pekgijaba pekani donga. Ia pekaniara, chu ringe spiritually pekani, psychology pekani, tangka jakkalanio pekani aro rokkomari gisikni aro janggini pekanikoba bak dongpa•a. Ia chu ringanio songsalna namgijaniko ra•baode, sera bera katta agannahaode, dedrang ba pagipa-ma•gipa nokdangni tom•tomaniko jingjengatode, ian chu ringanio pekgija pekaniko mesoka. Chu mandeko kragijaniona dilrongbata. Uni gimin mande chuko gelna man•on nambatbea.

• Ia Easter Monday-o, A•chik a•songo bang•an chiring wari aro namnamgipa biaprango damsan cha•beronga. Ian nambea. Indiba bilsiantian ia kusini salo duknikoba knaronga, jekai saoba chio janggi galana, saoba til•ekana, saoba jegrikana, saoba bottle dokpretana, saoba peke salenba accident ong•ana aro rokkomari ong•aniko knaronga. Ia rokkomari a•sel ong•ronggiparangoni, minggittam nambatgijagipara: Janggi galani, til•ekani (pante me•tra ba me•apa-me•chikma) aro pekarame accident ong•ani. Iarang maini a•sel, ong•a? Iarangna aganchakani bang•bea, indiba kan•dikbee agangenchimode a•gilsakni gitasan kusi ong•ani a•sel aro janggini gita toromo chakatpil•ani dongja•ani a•sel ong•a. Ia dal•batgipa Christianni bebera•ani ja•pango bang•an gilja re•anga aro bang•an gilja re•gija a•gilsakni gitasan an•saona tarisoa.

• Uni gimin an•ching ia Jisuni chakatpil•aniko gisik ra•engon, an•chingba namaona chakatpil•na ja•ku de•rimna. Gisikni aro janggini gita cha•katpilanina krengna. Picnic cha•giparang je biapo ong•genchimoba mikrake aro simsake kra•a bewalo katchachimrimna. Simsakbee katchae jinma damsan chakatpil•e cha•rimna. Isolo chakatpil•anigri picnic cha•genchimode ian ong•gramaigipa katcha•ani ong•a.