Ma∙skima

Angsi jomi dongonga,

Saksan a∙ba re∙matja.

A∙ba sampangkuri dikpripa,

Samjil dangna rang∙sokja.

Ka∙saa namkalongama, sajima grankal∙angongjokma,

Ka∙sin anga de∙chaatna, dimbrengkal∙e dandanda.

Angsi nang∙na ra∙bara, minil chaming cha∙etpa.

Ku∙sa ku∙gni du∙atna, be∙en bilakba∙kanna.

Jawan dakgamongjokma,

Samman balnangongjokma.

Miba cha∙o cha∙napja,

Chiba ringo ringnapja.

Jamba rikna man∙kuja,

Salbarako neng∙kama.

Mikka balwa rakba∙a,

Ha∙sil jamcha katkuna.

Angsi saja jomjaodi,

Jakra bamil matchotgni.

Be∙en mangrakpa∙odi,

Akgni sukko man∙pagni.

*****

Ortorang:

angsi - segipa

sampangkuri - a∙ba dikgipa samsi jatsa

samjil - samjiljil, samsi jatsa

grankal∙angongjokma - komikal∙angengjokma

ha∙sil - a∙bao cha∙pagipa nokgipin, jean hiri sima apsangrika.

jakra - a•bao skanggipa samsirang pikani ba dangani.
bamil - skanggipa samsi danga ba•chotani ja•mano samsi dangai

Miksongani:

      Ia poem ma∙skimani, jikgipa segipani ru∙utbee sakamani gimin duk ong∙bee skime an∙tangtang golpoenga. A∙ba samsi dikpripani gimin a∙ba re∙angnade sikbea indiba segipako nokko saksan galangmatskaja. Indake jikgipa, segipana simsakbee una ka∙sabee duk ong∙bee una pringo cha minil ra∙bae setangna du∙engon segipani saaniko namkalangama namkaja∙enga, ua sing∙a.

      Ua duk ong∙tinge, segipako sam jawa sam kal∙akengama ineba chanchiman∙pilenga. Indaken ua skimbee mikoba chikoba cha∙napja ringnapjaha. Segipa saani a∙selo jamatdal, a∙bao neng∙taknaba rikna matchotjaha aro sal rakko mikka wao indakpil∙e neng∙nikaniko man∙aha. Indake ua saksan a∙ba re∙ango, mikka balwa rakba∙ode a∙ba noksulni jamchina katnapna nangbeachim. Ua segipa an∙seng baljoke dongode katchae dongna man∙genchim ine ma∙ringaha.