Ripeng Namtea

Ripeng baju namtea,

Katta ku·bimik knatoa;

Wakeng ku·keng ku·gepja,

Ku·eng ku·chok botpaja.

Mikkangode namane,

Simsakbone Dambe-ne.

Mikkrem mikjap dakbea,

Ku·misi ku·misa ra·pila;

Mikgitching mikpakma donpil·e,

Mikreng miktong nirongretpile;

Golpomikkane jinmaone,

Mikkrakbone Dambe-ne.

Jakjip jaksi reprepe,

An·tang nangrok dangtape;

Nachilkolona rang·san gongjole,

Nang·na chake biko gale;

Chi·mikene rentanawane,

Nang·ko cha·na Dambe-ne.

Mittin noksam nokgillo,

Chel·tang noksul songsulo;

Niokane nang mata pariko,

Galonna salonna man·ako;

Jelatgene a·sakna ku·jole,

Dambe-ne, simsakbee dongbone.

Ma∙skima

Angsi jomi dongonga,

Saksan a∙ba re∙matja.

A∙ba sampangkuri dikpripa,

Samjil dangna rang∙sokja.

Ka∙saa namkalongama, sajima grankal∙angongjokma,

Ka∙sin anga de∙chaatna, dimbrengkal∙e dandanda.

Angsi nang∙na ra∙bara, minil chaming cha∙etpa.

Ku∙sa ku∙gni du∙atna, be∙en bilakba∙kanna.

Jawan dakgamongjokma,

Samman balnangongjokma.

Miba cha∙o cha∙napja,

Chiba ringo ringnapja.

Jamba rikna man∙kuja,

Salbarako neng∙kama.

Mikka balwa rakba∙a,

Ha∙sil jamcha katkuna.

Angsi saja jomjaodi,

Jakra bamil matchotgni.

Be∙en mangrakpa∙odi,

Akgni sukko man∙pagni.

*****

Ortorang:

angsi - segipa

sampangkuri - a∙ba dikgipa samsi jatsa

samjil - samjiljil, samsi jatsa

grankal∙angongjokma - komikal∙angengjokma

ha∙sil - a∙bao cha∙pagipa nokgipin, jean hiri sima apsangrika.

jakra - a•bao skanggipa samsirang pikani ba dangani.
bamil - skanggipa samsi danga ba•chotani ja•mano samsi dangai

Miksongani:

      Ia poem ma∙skimani, jikgipa segipani ru∙utbee sakamani gimin duk ong∙bee skime an∙tangtang golpoenga. A∙ba samsi dikpripani gimin a∙ba re∙angnade sikbea indiba segipako nokko saksan galangmatskaja. Indake jikgipa, segipana simsakbee una ka∙sabee duk ong∙bee una pringo cha minil ra∙bae setangna du∙engon segipani saaniko namkalangama namkaja∙enga, ua sing∙a.

      Ua duk ong∙tinge, segipako sam jawa sam kal∙akengama ineba chanchiman∙pilenga. Indaken ua skimbee mikoba chikoba cha∙napja ringnapjaha. Segipa saani a∙selo jamatdal, a∙bao neng∙taknaba rikna matchotjaha aro sal rakko mikka wao indakpil∙e neng∙nikaniko man∙aha. Indake ua saksan a∙ba re∙ango, mikka balwa rakba∙ode a∙ba noksulni jamchina katnapna nangbeachim. Ua segipa an∙seng baljoke dongode katchae dongna man∙genchim ine ma∙ringaha.

Oh angjong anurang

Oh angjong anurang, rittim gitalrang

Tangsimbae nitobee soksolgiparang,

Chasong dingtang gitalni pante me·trarang.

Bimik nadubamiting kambi dudrabamiting

Jeko jako bingbing bangbang dakna sikmiting

Tapi nina gimikkon gisik ding·chaobamiting.

Rudapbone chikone, pulna ka·sin chijime

Rittimba·kan bijakrang to·om to·om so·ome

Balgaochina ching·chet rimmit nina nitoe.

Skibone namako gisik ka·tong dingchike

Sa·ra nokkra rongtale, pringanti ottroke

Noksam nokgil gilkrie-pang·sange.

Balgao gital bibalko da·a rim·ekabune,

Sile name balgaokan dangtapgija donbone

Ruram minianade da·a mikbokabone

Chokgilek bakgilek da·a na·mang dakbone

Kang·krang chikrang dakako jawa namnikjahane

Nama gunko an·tangna tom·tom donge chimongne.

Gadom gitting jambura cha·o breiwbeane

Minmangija komila namen mesengbeane

Tapiljang te·gatchukoba jo·ong dongo galane.

Mikcha ka·saakude da·a dakamkubone

Bilsi kari sokjokko  ra·na dongna man·gene
Chonmitingo da·oan dimbrengako dakbone.

Poem-ni miksongani:

Ia poem-o dal·drobamitingo dingtang dingtang nama gunrangko aro changa sapanirangko jekai poraiachi skie ra·na nanga ine agana. Indiba gisik dambe ong·engon skatang jekoba jebasiba dakna sikaia. Indake bang·bea dakna sikanirangoni mingsara gisik dambe ong·mitingo mikcha ka·sana sikanian ong·a. Bregija jora ripeng ra·aniara nokdangna mesengbeani aro jrimbeani ong·gen. Uni gimin ia poem-o pakkrong mangrakna skang jora ripeng ra·aniko champengchina mol·mola. Aro chadamberang gisikni aro bilsini gita chanchina brejoko, mikking taru rakjokko aro nokdang ba·kuko chalaina bilsokjok-kona sengchina agana.

http://www.writerscafe.org/writing/sangmatalen/1923290/

Ma·ningsa

Dikkileng ganggarionga bi·na mitta

Dilseng wakilekkonga grapna inta.

Do·pisa illikbionga sa·ra baling

Hait ‘node katbrujaonga pangnajring

Rikario ku·nenga dokmikmakko jaknenga

Una dokku matchraka, ina satu til·branga.

Abotari bekbekgi, nachil gokchipil·e

Kon·konari bawili bitti bittangpil·e.

Dikdikhaba chel·tangja man·dikpil·a

Rupabuda na·aba nang·ni tru baksa.

Kal·pabuda dingtangcha hawa nokracha

Nang·buningko okambae andipicha.

Saljatchio misalna okamnapang

Damsan cha·na ja·man intang

Nang·ni te·bil garira ga·timrao

Sarong rong·chrakra nokkra noksikkao

Rorimbone babune gise dokgrikgija

Katta ra·ba angjongde nambeaba.

http://www.writerscafe.org/writing/sangmatalen/1922929/

De Apade

Ja·wil jakwil dakari, mikron niwingwangari

Ma·ko mande ra·agri, pana nachil songgagri

Ja·kol ja·gam tokmrangi a·gimikcha sokwini

Icha ucha katbrangi, dongbu na·di apa rajadi.

 

Buring sammring napgija, ru·at nadi gangija

Mikka bitchi ringpaja, kang·kariba kom·paja

Nokna krong den·gija, wa·ring den·a changgija

Wa·ding chitna sapgija, dongbu skigija apa raja

Ding·ol gram chijama, salbimangko chakjama

Jamatdalo tudama, mina samdang pikjama

Dangrok tetrokgijama, a·totna nitimijama

A·ba chiga nikgija, apa cha·na man·genma.

Chiring chikol chiabrek,  milsi pi·a wakibrek

Kamna ito mikubrek, ina doko gingkubrek.

Chima wari abumek, noko napo kom·tetrek

Jakma jaksi kal·mikmek, di·sa ganda awilek.

Den·bo wa·tre wa·tibok, pubo nokna chikrok

Krongna a·kol chu·bujok, bera wa·si su·bujok

Noking wa·jak chekbojok, masu du·mok jilbojok

Cha·ram turam nibojok, nokadamna rikbojok.

Re·chaboha dimbrenge, sikelboha da·ode

Ja·man ja·wil intande, sko taru brijokode

Dongmanoa skimbee, tangmanoa mikchi sepe

Apade na·ade nang·ma nang·pa bon·ode

Badike·en daknawa, ma·ringeha tangnawa

Sawa nang·ko ninawa, aratanan galnawa

De apade, bilakaba na·ade, jakminaba kamode,

De apade, nang·na dukko man·ade, de apade.

Miksongani:
Ia poem-o, ma·gipa kambi dobaenggipa depantena agan-ku·patia. Depanteko bi·sa ska baksa skatang roram-mnigija, ma·ko paako mande ra·e aro ma·ni paani kattarangko knachina agana. Buring-rangchi re·gija, kam ka·gija, wa·ding chitna, krong den·gija aro dingtang dingtang changa sapako skie ra·gija donganiko beng·a. Sal raka chakgija, mikka wachichakgija aro arate tusiari an·tangni kamko ka·gija mikkangchi janggi tanganina simsakjaode ja·mano cha·na ringna skimbegen. Milsi pe·ari, ang·ke na·tok rim·winiari aro chima-chiring warirango auwsimari dongode namjawa. Jakma jaksi a·mangrara bi·sa chonengmiting gita a·mangrangko kal·sime dongode aro kamna agano suchipe napchipe dongode cholijawa. Rokkomari kamrangko skie ra·china jekai wa·a den·a, chikrok pua, nokna a·kol chu·a, wa·si su·a, nok bera wata, nokkingna wa·jak chekna aro dingtang dingtang an·tangni janggi tanganina skie ra·samsochina agana. Bewalko namaona dingtangatna krengchina mol·mola. Ong·jaode ja·mano bilsi dal·manjokode kamna changja ong·ode darangni jakko galchipako man·gen aro skimbee janggi tangna nangnawa.  Bon·angachipak ma·gipa agantaia, depanteara changa sapa, bilaka, chakninggipa, man·inggipa aro jakma nambegipa ong·a inenba detangko ku·pattia. 

Ma·a dena ka·sabee chasong gitchammi kam ka·a bewalo pangchake skia. Chasong gitalni gita, ian bimchipbee poraichina aro rokkomari changa sapaniko skie ra·china didiani ong·a. Depantena ka·sae aro duk ong·chakenba, gisik nange bimchipe kam ka·ode jakmingipa aro sapgipa ong·a ine depantena rasongko on·e ku·pattia.

http://www.writerscafe.org/writing/sangmatalen/1921466/

Aman A·mandu ma·ama

Jokenggipa chima chibima da·o tipangnasia

Chona dal·a na·ma na·tok siangtoknasia

A·brini ka·singipa grika chimik mitu mitu naram

Na·ma na·tik chi·ronggi simdikpil·e jelram

Do·ma do·bret do·pa-ni gangjipe abuchakram

Chimindek chiakong chijimgipa a·manduranga

Nitobee ning·tuao ontime ga·akgipa wariranga

P’lak ma·janggini ma·chakram da·o dil·dilenga.

Saliramni aramko salbagipa  boldim

Ding·chaowana nigitoo on·gipa salakim,

Ka·sinango do·matko chimonggipa chibisik

Bekbak bekbak ritibingbing bolbok-ni do·sik

Tenggarie pring attam hopenggipa balgitchak

Gitchak rimit rokkomari balenggipa samgitchak

Sal chokonango cha·ame gisikgipa a·dokni do·misal

A·kingni p’lak mikkimrang gimaanga chibasal.

         

Dal·gipani ga·bele roram to·omgipa a·du a·sim

Ran·krakangjok rakdakbejok gimaanga chijim

Katbrangenga uamang ka·abee a·mikbrang satbranga

Sana a·sal a·ni ma·dot umangni dokbranga?

Rokuna bano kal·kuna sikko a·gimiko a·kanga

Chanchiagri nipilagri gepgepe matnanga.

Jrip dong dikdiksana na·a mikburak padot

On·tisamang dongdik ja·deagri, jakbite an·tangnan mangot.

Ma·ringenga ma·amenga Aman A·mandu

‘Siangengjok angade tipangengjok, angko ripingku,

Na·mangnaan namgni rongchingani ja·pang

P’lak ango dongako simsakbee jakalang’

N.B.:  Ama A·mandu mandeni mikburake sakko donggipa do·mat, burung bolgrim aro chima chiring-rangni gimaanganina ma·ringa.

http://www.writerscafe.org/writing/sangmatalen/1917720/

Bi·sani Salrang

Ra·ata gisiko skang salrangko

Bi·samitingo sal ja re·atarangko

Bilsianti mi ratman tetmano 

Bi·sa jinma a·palo soi kal·ako 

Dimdim ta·rake kate bing jokako. 

Da·a watbo tap tokna krengbo bikode 

Hempeta rikeming tokbo bildape. 

Ame chinga man·e sakprako tokna 

Katchaprete chrike anga bilchroka.

Hai wa·tibok ta·rokroko den·a re·na
Baigipa nampretako bipong dakna
Kasibretko den·a-alnok gotinade
Damdong damdong kan·dike doktoe
Ate an·cheng siteming re·najok an·chingde
Ra·e babani ate mande bolma matgipako
Srangsrang alturiri den·a matako
Kal·ginok an·chingde dang gotiko
Nangjawaba da'alde nang mikingko.

Knalode an·chingde sunday-school ja·mano
Re·najokai ranggirachi mepring cha·mano
Gitoko batil kie, chimani rong·chiko kole
Chola balbeng kachangchote guli ra·bite.
Rokomari do·o cha·enga bolgru sada biteko
Ritibingbing Drongo ringenga alot bitchiko.
Ha! nangatjok do·pilgimko top dake
Ga·akangjok haiwachipak bilsengchoke.
Man·jok paiprot, do·kru, kutilok, do·tileng
Kari jal·ik saprete nongi cha·jok huhapile.

Janggilo jongko ba·e, ate ra·e da·alde
Gojal atul ra·jole sriksrik cha·ani toko sepe
Wa·tokna namako, wa·tiboko den·rane
Re·najok bolpruko chaka sotna an·chingde,
Riknajokai mandal gari, a·dario ga·na
Ong·jaoba a·dapo sikdudue kal·na
Ta·rakbatatna humak sekiko nongna.
Attam simsimango rona an·senge
Susanajok an·chingde a·dario rongronge.
Bura-ni chaka okbongan ta·rakbataiade
Srapajade darangnian, ja·man chaktelaiade.

Beng·oba ka·chaoba, an·ching aka mo gadomko
Salo rame rendiate dona jamburako
Kal·a unikode baipaa ubuchetade
Rakprete chap ka·omangba bretningja uade.
Aia aia ro·ongkosa tingakmanjok da'nang,
Ja·skil gilgaopiljok, ma·ang su·ang.
Ja·pa riking ja·si bima simprang simprang
A·mangming jambura bisiming daka karang
Ra·ata katchariri ka·dingsmita uan salrang.

Bengbong dokna re·a wachikario
Cheki ra·e na·tok rim·a chima wario
Na·rong na·bat na·tik kom·a kom·a.
Indioba changsaode indakpile kenjok
Na·tok ine cheki de·dopaora chipusa gaskajok.

N.B.: Iano poedo-o, bi·sao maikai sal somirangko re·atahachim uarangko gisik ra·atani ong·a.

http://www.writerscafe.org/writing/sangmatalen/1889758/