Do·patchi

Chonengode nikpa·achim chongipa do·o do·patchi

Bangbang sako bilwinie ringako mikka bitchi

An·sengata nitoriri bilnapa wengwat wengwatachi

Ta·rakprete bilsengchoke rang·san bilnapachi

‘Chret chret’ mikoenba ring·ako pangsuni ning·chi.

Rorongachim nokmandeo, A·chikrangni noko

Knatobee sulko sale am·pang ning·o gitko

Kal·grikachim pi·sa ama jajrengangri bitipo

Tom·tomate nokdonggipa mandena knatobean sukko

Dondikagri attamango ring·a, gualate neng·ako.

Ka·chaa atchu mikreng nia do·patchiko mangkalana

Ama jaksi jing·jingpaa, ‘Bisongkode jotrekjana, a·rikjana’

‘Nokku jamku wa·al su·chimpeming katana’, ambi ku·misicha aganpaa.

Dokna satna am·a apa chingni wakilekbeana,

Ina bi·sa denggurangba wa·jareng wa·bibomko donmikmakke kata.

Aia niat! Menggo mikbugrak donga tom·tom timme

Nokking pangsuni on·dimachapak mikkron nirongretkam·e

Cholko ra·e ku·chi mitap bilsengchokako bik rang·san chikna

Tap bing·sipari niksrapgijakon bilchrokari chikkaprikna

Ku·eng ku·chok chikkape balangaijok da·ning detangna.

Gimajachim indioba menggo chikna man·oba,

Mikka balwa bilakkoba bi·sa bitipone ga·akonoba,

Bitchi te·rok rongchinggipa maibakai rongtombaoba.

Katangtokjok da·nang do·patchirang dongram turamna

Am·pang wa·jak rotoako sandie, nokking tinko pinnana.

Da·oni bi·sa di·sa ma·manjajok do·patchikoan

Nikpajajok umangde do·patchini bimangkoan

Knajaengjok do·patchini ku·rang bewalkoan

Unan 'greba, ‘Badike daka?’ ’nesa sing·arongjok nokmandekoan

Uijaha chadamberang atchu ambin nok jam dongramkoan.

Do·patchi - Swift, photo by: James T. Sangma

http://www.writerscafe.org/writing/sangmatalen/1941582/

x