Ang Atchiram

Ang atchiram a·songtang Garo Hills
Buring bolgrim nitoa Ranggira Hills
Chima chiring joka chimik ka·sinjrim
Rong·ma rong·kong nitoabea rong·grim

Silang dare a·gitchak gamchata a·simdim,

Jela na·bat na·tik ang·ke na·rong mitim
Ra·kamgen ang gisik Nang·ko jringjring
Ritimatgen pangnan ango Nang jagring.

 

Do·pa do·chok mona do·misal do·grik
Do·bikrot do·gitang do·reku do·mindrik
Kutilok gugilok do·tileng selokgangok
Do·amek te·brong kambeo pa·e aganok,

Sokbaenga da·alde mahari nang·ni nokona,

Songga batbaenga nok jamko nina.

http://www.writerscafe.org/writing/sangmatalen/1892211/

Sakprakni Janggi

Songree ia a•gilsakko,
Jakkala kragija jakgitelko,
Chu ringe chu peke jua kal•e,
Til•eke Isoloni chel•e,
Re•ata salrangko gungri ong•e.

Poraigija anga bimchipgija,
Apani sikako chu•sokatgija,
Dabia apako on•china gamjinko,
Rusia uigija janggitangko,
Re•rurae andala papni wario.

Isol an•chingna ka•sachaka,
Gimagimin papiko nichaka,
Giik pil•e an•pilon katchaa.
Dakgimin p'lak papko guala
De•mitel Isolko jringjrotna,
Salanti suakpile pattiana.

Mikkrake hai kamko ka•na,
Kakket ong•e ja•ku de•na,
Bamna an•ching Nama Gisikna,
Katchabee dangdike on•a,
Mairongpile an•chingna ka•saana.

Sakprakni janggi Isolna gamchata.
Hai an•ching jakritinge re•chakatna.
Isolni songnokko napna.

N.B.: Iano sakprakni janggini mairongpil•e Isolna gamchatako agana. Gisik pil•e an•pilon Isol kema ka•a aro katchaa. Uni gimin saksa mande sakprakkon ku•monge Gisik R.gipani dilachi Isolona nama kamko ka•e re•china mol•mola.

http://www.writerscafe.org/writing/sangmatalen/1891087/

Ang Janggi

Bon·aha songreani ia a·gilsakko,
Re·baaha ang Kristo-ona wate be·enko.
Kalnimnabeha; Bi·chakbo indiba chingna,
Sa·grerang baksa ring·a chinga Gitelna.
Katchaan gape saknaagri chinga jringjrotna.
Nokdang ge·san, gisik dolsan hajal iano,
Toksan nangrime Kristo saksano.
Raphael baksa chinga p'lakan
Isolni sichidareko ra·e chinga sakprakan,
Dakgrikenga chena Lucifer-ko,
Galona wal·sareo uko ja·rikgipangko.

Mikrakna p'lak mandean
Chu·sokatna Isolni nangnikaniko salantian.
Togigija pekgija namgija bewalo,
Tom·dakgija andalgipa walo.
So.otnabe janggiko ka·o nanggachi,
Ja·riknabe Lucifer-ko mitumituchi.
Bang·an siaha mitchie tangachi,
Adol ka· e be·enko kragija wangale janggiko,
Sonako jamo chipe, wa·alko dokkimate,
Ku·rangna nachil rake, mikronko dubiate.

Skie ra·bo salsal janggiko rikna,

Sastro-an chong·kimgipa krong salgina.

Knatimbo poraibo ja·rike Uni skiako

Alnamna bi·amgipana, dakchakna papiko,

Inchroe ra·chakbo ku·patiako.

Tange Nama Kattao, jegale miteko.

Rongko basegija newilwale jatprakna,

Ka·sae bobilna, bi·chake a·rikgipana.

Cha·ani kalnimgipana, ringa ringagrina,

Nok a·gitalna, chola til·tilana,

Niroke sagipana aro re·e pattoko ka·dimeatna.

Songreengon Jerusalem gitalona,
Gualnabe pangnan chiripramkoba,
Dal·batgipa minggni ge· etako manie:
A·gilsaknina skang salgiko am·chenge,
Dakgrikbo namgijako tange Nama Kattachi,
Re·babo sakprakan Nama Gisik-ni dilachi.
Bi·enga chinga salwal na·mangna
Maina Isol mairongpile sakpraknan ka·sara.

N.B.: Ia poem-o, poedo siangaha ong•genchimoba a•gilsakko tangenggiparangna sa•grerang baksa soitan-ming dakgrikenga ine aganenga. A•gisakni manderangna bi•chakenga aro salgio napna man•china ku•patienga.

http://www.writerscafe.org/writing/sangmatalen/1889788/ 

Ripeng Namgipama

Ripeng salanti sambao

Attam pring sal nabao.

Riting sring jakriting jeja biapo

Kusin gapantio roa ma·gapao.

Apsan roa ka·dinge salantio

Re·ata salrangko katchaanio.

Golpoe ma·gape jakchapa ja bilsio

Ma·chapa pangnan duk mikchi grio.

Gronga rokkomari baju ripengrangko

Man·a an·senga somoio duulako.

Sokbaia tebilo cha·na ringnan

Diba jajrenganio, chel·tangangan.

Gimaane sal rakpret ding·preto?

Nikjane a·ran ba ding·kario, nang sin·o?

Bang·pretama balrorokario ‘ro bala balpongo?

Basenan a·susuma, nikama namgipa bibalko?

Simsakbone, ripeng dingtanga a·selrango

Watgala dongala nang mikchi ong·o

Dongaiaba indiba chong·mot baju

Sinteo kalimanio ra·bagipa rongchu.

Nang·ni nangan salo sokbaama?

Baljrimaniko olchakna re·baama?

Ka·dimeatani, kusini ‘ro katchaatani

Sambaoma baju, ong·ama nang baksa mikchi?

Dongode, uan ong·a nang kakket mahari chatchi,

Chadeng warakchakgipa, sangipa; dongjaha bangki.

Uni gimin ukon gamchate rakkibo, maina uan sona,

Uanke nang Te·teng, rang·gitik on·gipa nang·na rupa.

Ripeng Namgipama - see at @WritersCafe.org

Bi·sani Salrang

Ra·ata gisiko skang salrangko

Bi·samitingo sal ja re·atarangko

Bilsianti mi ratman tetmano 

Bi·sa jinma a·palo soi kal·ako 

Dimdim ta·rake kate bing jokako. 

Da·a watbo tap tokna krengbo bikode 

Hempeta rikeming tokbo bildape. 

Ame chinga man·e sakprako tokna 

Katchaprete chrike anga bilchroka.

Hai wa·tibok ta·rokroko den·a re·na
Baigipa nampretako bipong dakna
Kasibretko den·a-alnok gotinade
Damdong damdong kan·dike doktoe
Ate an·cheng siteming re·najok an·chingde
Ra·e babani ate mande bolma matgipako
Srangsrang alturiri den·a matako
Kal·ginok an·chingde dang gotiko
Nangjawaba da'alde nang mikingko.

Knalode an·chingde sunday-school ja·mano
Re·najokai ranggirachi mepring cha·mano
Gitoko batil kie, chimani rong·chiko kole
Chola balbeng kachangchote guli ra·bite.
Rokomari do·o cha·enga bolgru sada biteko
Ritibingbing Drongo ringenga alot bitchiko.
Ha! nangatjok do·pilgimko top dake
Ga·akangjok haiwachipak bilsengchoke.
Man·jok paiprot, do·kru, kutilok, do·tileng
Kari jal·ik saprete nongi cha·jok huhapile.

Janggilo jongko ba·e, ate ra·e da·alde
Gojal atul ra·jole sriksrik cha·ani toko sepe
Wa·tokna namako, wa·tiboko den·rane
Re·najok bolpruko chaka sotna an·chingde,
Riknajokai mandal gari, a·dario ga·na
Ong·jaoba a·dapo sikdudue kal·na
Ta·rakbatatna humak sekiko nongna.
Attam simsimango rona an·senge
Susanajok an·chingde a·dario rongronge.
Bura-ni chaka okbongan ta·rakbataiade
Srapajade darangnian, ja·man chaktelaiade.

Beng·oba ka·chaoba, an·ching aka mo gadomko
Salo rame rendiate dona jamburako
Kal·a unikode baipaa ubuchetade
Rakprete chap ka·omangba bretningja uade.
Aia aia ro·ongkosa tingakmanjok da'nang,
Ja·skil gilgaopiljok, ma·ang su·ang.
Ja·pa riking ja·si bima simprang simprang
A·mangming jambura bisiming daka karang
Ra·ata katchariri ka·dingsmita uan salrang.

Bengbong dokna re·a wachikario
Cheki ra·e na·tok rim·a chima wario
Na·rong na·bat na·tik kom·a kom·a.
Indioba changsaode indakpile kenjok
Na·tok ine cheki de·dopaora chipusa gaskajok.

N.B.: Iano poedo-o, bi·sao maikai sal somirangko re·atahachim uarangko gisik ra·atani ong·a.

http://www.writerscafe.org/writing/sangmatalen/1889758/