A·chik ma·ambini dakba·a
rikba·ani gitade, mamung saloba mahari apsannoni me·a aro
me·chikko, ma·chong dingtanggenchimoba jika-sea dongna on·ja aro kimna dongna
beng·a. Ma∙ambini dakrongbewalba∙ani gitade, mahari
dingtangkosa, jekai: Sangma-Marak, Sangma-Momin, Sangma-Sira,
Sangma-Areng; Marak-Momin, Marak-Sira, Marak-Areng; Momin-Sira, Momin-Areng;
Sira-Areng dakesa jika-sea dongrongba∙a aro nokdang ba∙ku dakba∙a. Kosako mahari-jora
segiminkosa jika-sea dongakoba ki∙a ine agana aro
namnika. Ian jatni mingsa gamchatbegipa aro nitobegipa dakbewal ong∙a. Ia jika-sea kimbewalko
an∙ching gima∙atjaode baditan jatna
rasong mikkim ong∙achim,
maina chanchichipanio, a∙gilsako
darang jatan iandakgipa dakbewalko ja∙rikgipa dongjawakon. An∙chingara ia mingsa jatni mikkimko gima∙ate kimmitoara ka∙pakjawama aro ka∙a be∙e ma∙ringjawama? Uni gimin
ripingani jakkipanide an∙ching
sakprakni jakoan ong∙a.
A∙chik jato bi∙sa atchiantalan, sako
mama-mani nanggen, sako ano-abi, ada-angjong, noa-namchik nanggen; sako
appa-awang; sako mosa-boning, mosa-sari nanggen tarisogimin gita ong∙a. Da∙ororo an∙ching poraia skia
donggiparang mahari dingtangkoba dal∙batmesikana, mande ra∙ani chin gita abi-ada ra∙aienga, indiba iara jatni dakbewalo kra∙ama? Ma an∙tangna dal∙batgipa mahari gipinko
mosa-sari ra∙oara mande ra∙e okamani ong∙jasa? Mahari gipinko
ada-abi ra∙aiosan, mande ra∙ani ong∙a aro mosa-sari okamode
mande ra∙ani (respect) ong∙jagenchimode, anga-na∙ade kam-bewalchi ma∙ambiko saia-chonnika gita
chacha ong∙skaengjoksakonne.
A∙chik ma∙ambini dakbewal niam-reti
gita ja·rikgija, mahari apsan jika-sea kimketchigipa, jekai
Sangma-Sangma, Marak-Marak, Momin-Momin, Areng-Areng aro Sira-Sira jik-se
dongakode ong·nikjae, raken beng·a aro ki·ja ine agana.
Ki·gija mahari ganda mahari, ma∙chong
ganda ma∙chong mikcha ka·sagipako,
jika-sea kimmako, ma·a paa aro mahari ma·drang raken champenga, ingrima aro
solgrima. Beng·ako manigija kimdragiparangko bisongtangtang ineba ma·drang
mahari chra depante dongjajok ine suk ong∙jae namnikjae galchipa aro
nigala.
Mahari apsanko kimgipako
(jekai Sangma-Sangma skako ba Marak-Marak skako donggipakon) bakdong ine
agana. Ma·chong apsan kimgipako (jekai Agitok-Agitok skako ba
Chambugong-Chambugong skako kimgipako) ma·dong ine
agana. Ia ma·dong jika-sea dongdragipakon agan-me·apao atte
ska den·teka ineba agana. Ia bakdong aro ma·dong donganiko,
ma∙ambirang raken jegala aro
nidikbea maina uamangna kratcha∙beanio
kra·aniba ong·jachim.
Ia nambegipa ma·ambini
dakbewalko seanio, darangba gisik sapajachina. Ia seani, mingsa jatni
nambegipa dakrongbewalko ripinganina aro jakkipanganina didiani gitasa seaha.
Uni gimin anga-na·ara, apsan maharini saksa mande namako nikoan joratang ine
mikchae kimmaigenma ra·aigenma? Ma ma·dong ba bakdong dongakon,
'Hait da·ode mamungba ong·jahaba'
inean ong·nikaiengjokma? Angna nang·na mahari ge·bri dongkua,
uarangoniko basena dongjawahama, uaba A·chik jat gimik mahari gipinnoni mande
nama dongjahama? Donga bang·a. Uni gimin, chnachie, ripinganide sakprakni
jakoan. Depante pagipako dokmalja. Apsan dake, namgipa dakbewalko uieba
ja·rikgijaniara, ma·ambiko doka gita ong·a, ian ma·ambiko dokani
namja. Hai jatni nambegipa dakbewalko ripingangkuna, nambregiajko
taripangna aro namgijako ra·galangna.
Ma∙dong aro bakdongko talbate
uina gita, mitam ma∙chongko
jakkale flowchart-o ka∙mao mesoka.
