RanggiraA∙chik: February 2020

A·chik ku·o Ama Appa channaniara (An·chi nanggrikaniara), English ku·na batede rongsrangbata aro talen ma∙sibata gita nika. Da∙ororo A∙chik chadambe skarang sako maidake okamna nanga, bang∙an uitokjaengaha aro gimaangengaha, maina bang∙bataan ku∙tangchi ama-appa, ade-awang, ma∙jong-pajong, mama-mani aro gipin an∙chi nanggrikanirangko ku∙tango jakkaltokbreja∙engaha. Ia segatanio an∙chi channanio, ming 37 agana-ra∙anio pangchake talataha. Ia ma∙a-paa channanirangko, ka∙mao seanirangoniko hai an∙ching jakkipna aro snamtaipil∙na, maidakode ku∙tang jrange teng∙angkugen.

1. Ama: Bi∙sani ma∙gipa; okoni atchigipa bi·sani ma·gipatangko aganani aro okamani.

2. Baba / Appa: Bi·sani pagipa; bi·sani pagipatangko okamani.

3. Ada / dada: Soksanni dedrang, an∙tangna dal∙batgipa me∙asako okamani; Ba·rimarangoni chonkalbatgiparangni an∙tangna skang atchigipa, an∙tangna dal·batgipa me·asako okamani; Ma·jontangni / pajongtangni depanteko jean an∙tangna dal∙batgipa uko okamani (Da∙o chasong gitalode, jean ma·jongtang-pajongtangni aro ma·detang/adetang-awangtangni depante, skang atchigipa an∙tangna dal·batgipa me·asako ada okamaia; Indiba skang chasongode an∙tangna dal∙batoba ba chonbatoba, ma∙jongtangni depantekosan ada ine okama.

4. Abi: Soksanni dedrang, an∙tangna dal∙batgipa me∙chikko okamani; Ba·rimarangoni chonkalbatgiparangni, skang atchigipa, an∙tangna dal·batgipa me·chikko okamani; Ma·jontangni demechikko okamani (Da∙o chasong gitalode, jean ma·jongtang-pajongtangni aro ma·detang/adetang-awangtangni demechik, an·tangna skang atchigipa dal·batgipa me·chikko okamaia; Skangode an∙tangna chonbatoba, ma∙jongtang-pajongtangni demechikkode abi ine okama).

Mahari apsangijagipako, mamung saloba ada ba abi okamna man∙ja. Ba·rima, iani ortoara apsan ma·a aro paaoni (ba soksannoni) atchigipa bi·sarang ong∙a.

5. Ajong / angjong / jojong: Ba·rimarangoni an·tangna ja∙man atchigipa chonkalgipa me·asako okamani; Ma·jontangni/pajongtangni depanteko okamani (Da∙o chasong gitalode, jean ma·jongtangni/pajongtangni aro ma·detangni/adetangni/awangtangni depante, an·tangna chonbatgipa me·asako okamaia; skangode ma∙detangni/awangtangni depantekode, an∙tangna bilsi dal∙batoba ajong ine okama); Ma·gipa aro pagipaba an·tangni depantetangko ajong ine okama.

6. Anu / nono / nunu: Ma·a paa apsannoni (soksanoni) atchigipa dedrangni an·tangna chonbatgipa me·chikko okamani ba aganani; Ma·jontangni/pajongtangni demechikko okamani (Da∙o chasong gitalode, jean ma·jongtangni/pajongtangni aro ma·detangni/adetangni/awangtangni demechik, an·tangna chonbatgipa me·chikko okamaia; Skangode an∙tangna bilsi dal∙batomangba ma∙ako channe, ma∙detang/awangtangni demechikkode anu ine okama); Ma·gipa aro pagipaba an·tangni demechikko anu ine okama.

7. Mama / obite / ubite: Jiktangni pagipako okamani; setangni pagipako okamani.

8. Mama: Abigipa / nogipani dedrang, ma∙gipani ba∙rimarangoni me∙asako okama; jiktangni pagipako okamani; setangni pagipako okama; adatangni / jongtangni jikgipani pagipako okama; bochitangni pagipako okama; gumetangni pagipako okama.

9. Mani: Jiktangni ma·gipako okama; setangni ma·gipako okama; adatangni / jongtangni jikgipani ma∙gipako okama; bochitangni ma∙gipako okama; gumetangni ma∙gipako okama; pagipatangni nogipako ba abigipako okama.

10. Sadu: Abisako kimgipa chawarirangni (ba abisani segiparangni) okamani/aganani ba changrikani.

11. Namchik: Abitangni / nogipani demechikko okamani; Abitang / nogipa nangatangni \ demechikko okamani; [Da∙ororo mitam jolrango, jonggipani jikkoba namchik ine aganenga, iade ong∙breja].

12. Ang gri / Gritang: Me∙asa, abitang ba notangni depanteko agana; Abitang nanga ba notang nangani depanteko okama.

13. Ma∙de / Ma∙di / Ade /Adi: Dedrang ma∙gipatangni nogipako (/nogipa nangako) okamani.

14. Awang: Degiparang ma∙gipani nogipani segipako okamani; Dedrang ma∙detangni (ba adetangni) segipako okamani; Dedrang pagipatangni jonggipako (ba jonggipa nangako) okamani; Ma∙gipani segipa siani ja∙mano, ma∙gipani segipa gitalkoba awang ine okama.

An∙ching A∙chik okambewalo, skatang mama ba awang ra∙na okamna man∙ja. Anga changsa saksa MLA-ko grongon, mahariko ma∙sichenggija uko mama ine okamachim. Unon ua MLA angko ‘Na∙ara maia mahri?’, ine angko sing∙aha. Anga aganchakaha, ‘Angade M. Sangma-ha’, innenba. Unon ua aganaha, ‘Indakode mama nangjawade, awang-sa nanggen’, inenba. Bebean ua MLA-ni jikgipa Sangma maharioni ong∙a aro uni jikgipa ang ma∙gipana bilsi komibata. Uni gimin ua MLA-kode anga awang nanga aro mama-de nangja.

15. Ma∙jong: Dedrang ma∙gipatangni abigipako (ba ma∙gipatangni abi nangako) okamani.

16. Pajong: Dedrang ma∙jongtangni segipako okamani; Dedrang ma∙gipani abigipani segipako okamani; Pagipani adagipako okamani.

17. Chawari: Demechikni pagipa-ma·gipa, demechiktangni segipako okamani; An∙tangni demechikni segipako okamani; Demechik nangani segipako okama; Abigipa notangni (ba nogipa nangani) segipako okamani.

18. Neo / Niu / neotang / niutang: Jiktangni ma∙gipako, jekon mani-ba nanga uko okama; chawarigipa manitangko niu ine okama-agana.

19. Cheksari / Niu-Cheksari:Jikni abigipa; jiktangni abi nanggipako okamani;

20. Nokkrom: (demechikni pagipa ba ma·gipa) demechiktangni segipako okamani indiba nokna donrikgipa demechikni segipakosan mingronga (jatni dakronga gita nokni chonbatgipani segipako, indiba je nokna donrikgipani segipakoan aganaia).

21. Gume / Gumi: Abitangni segipako (soksanni jonggipa ba nogipa abitangni segipako) okama; Je apsan maharioni abitang dake nanggipani segipakoba okama.

22. Boning / Buning: Ba∙rimarangoni me∙asa, notangni (ba nogipa nangani) segipako okamani; Jiktangni adagipako (ba jiktangni adagipa nangako) okamani.

23. Jongsari: Jiktangni jonggipako (ba jiktangni jonggipa nanggipako) okamani; Setangni jonggipako (ba setangni jonggipa nanggipako) okamani.

24. Nosari: Jiktangni nogipako (ba jiktangni nogipa nanggipako) okamani; Setangni nogipako (ba setangni nogipa nanggipako) okamani.

Angni uisokanio A∙chik ku∙o dingtangmancha jonggipani jikgipako okamani kata dongja. Jika-sea kima ra∙ani bidingo obostani kri, jonggipani jikkode nosari-rang nangeskaea. Jonggipani jikgipa, setangni adagipakode gume inerang nangeaia, maina segipani adatang ong∙e, adatangni jikgipade bang∙a changon una (me∙chikna) dal∙batronga.

25. Bochi / Buchi: Adatangni jikgipako okamani; An∙tangni adatang nanggipani jikgipako okamani.

26. Atchu (jakra): Dedrang, ma·tangni pagipako okama; Ma∙gipatangni pagipako atchu innariba okama.

27. Atchu (jakasi): Dedrang, patangni pagipako okama; Pagipatangni pagipako atchu jakasi ine agana.

28. Ambi (jakra): Degiparang, ma·tangni ma·gipako okama; Ma∙gipatangni ma∙gipako ambi innariba okama.

29. Ambi (jakasi): Degiparang, pagipani ma·gipako okama; Pagipatangni ma∙gipako ambi jakasi ine agana.

30. Angsu: Detangni degipako okama (ba agana); Ma∙gipa ba pagipa demechiktangni ba depantetangni deko okama.

31. Mosa / Musa: Mahari apsangijagipa, me∙asaska-me∙asako ra∙ani; Mahari dingtanggipa me∙asako okamani; An∙tangming mahari apsangijagipa trutang me∙asako okama; me∙chik ba me∙asa an∙tangming mahari apsangijagipa me∙asako okama; │ Jekai sangma me∙asa / me∙chik, marak me∙asako okama; tru apsan sakgni me∙asarang, jean mahari apsanja uamang mosa-sa ong∙a; mahari apsangipa me∙asarang mosa-sa ong∙na man∙ja; ma∙chong dingtanggenchimoba, mahari apsannode mosa ra∙grikna man∙ja; jekai, A. Sangma me∙asa ba me∙chik, T. Sangma me∙asako mosa ra∙na man∙ja.

Tru apsan, iani ortoara bilsi apsannggiparang ba chasong apsannanggiparang, chasong apsangipa ba apsannanggipa manderang.

32. Sari: Mahari dingtanggipa me∙chikko okamani; An∙tangming mahari apsangijagipa trutang me∙chikko okama; me∙chik ba me∙asa an∙tangming mahari apsangijagipa me∙chikko okama; │ Jekai sangma me∙asa / me∙chik, marak me∙chikko okama; tru apsan sakgni me∙chikrang, jean mahari apsanja uamang sari-sa ong∙a; mahari apsangipa me∙chikrang sari-sa ong∙na man∙ja; ma∙chong dingtanggenchimoba, mahari apsannode sari ra∙grikna man∙ja; jekai, Ch Marak me∙chik ba me∙asa, M. Marak me∙chikko sari ra∙na man∙ja.

Sari aro musa/mosa, ia channani-ra∙ani apsangrikangaia. Mahari apsanko mamung saloba musa ba sari ine ra∙ja.

33. Chame: Me∙asa mahari apsangijagipa me∙chikko, jekon jik dongna ki∙a, jekon sariba nangachim uko agana; Me∙chik mahari apsangijagipa me∙asako, jekon se dongna ki∙a, jekon mosaba nangachim uko agana; Me∙asa, mamatang ba manitangni demechikko chame ba sari nanga; Me∙chik, mamatang ba manitangni depanteko chame ba mosa nanga. │ Jekai, me∙asa an∙tangming mahari apsangipa me∙chikko mamung saloba sari ra∙na man∙ja │ Mesokna, Ch Marak me∙asa, Ch Marak me∙chikko chame ra∙na man∙ja; Ch Marak me∙chik, K. Marak me∙asako chame ra∙na man∙ja │ Sari / mosa / chame, ia minggittam apsangrikanga.

34. Jik / Jikgipa: An∙tangni kimgipa-donggipa me∙chikko okama ba ra∙a. [Am∙beng bewalo-de, jonggipani jikgipakoba jik ine de∙paarean mingaria].

35. Se / Segipa: An∙tangni kimgipa-donggipa me∙asako okama ba ra∙a.

36. Chra / Chra-depante: Jikni mamagipa; jiktangni mamagipako okamani; jikni nokdangna aro jikni ma∙drangna gamchatgipa ong∙a, maiba kam a∙sel gro ong∙o bil man∙gipa.

37. De / Degipa: An∙tangni bi∙sako okama-agana; An∙tangni me∙asa bi∙sako depante minga; An∙tangni me∙chik bi∙sako demechik minga; Adagipa ba jonggipani bi∙sakoba angde nanga ba de nanga ine agana.

Dedrango bakrang donga. Uarangara:

i) Dejakra: Skanggipa ba∙gipa bi∙sa; Sa∙tipko ochenggipa bi∙sa.

ii) Dekimbal: Bijangchio ba bijangchi dakangao ba∙gipa bi∙sa.

iii) Sa∙chon: Bon∙kamgipa ba∙gipa bi∙sa.

iv) Jonja: Sa∙tipsannoni apsan atchigipa dedrang. Jonjako dechap ineba agana.

v) Deburing: Segipa asoloni ong∙gija atchigipa bi∙sa, jean me∙chikni gipin me∙asa baksa denggu dake ba∙gipa.

vi) Depatchi: Nomil segipa kimkugijagipani, segipa kimna skang je me∙asaoniko bi∙sa ba∙a.

Ia chasongo, poraia skia donggiparangan, mongsongbate hostel-o, ba town ba city-o donggiparang, an∙tangna dal∙batgiparangko mande ra∙ani chin innenba mahari gipinkoba ada ba abi ine okamrongenga. Ia indake okamaniara ong∙ja aro kraja. Waiwai! Iako jeanina na∙ade angko ka∙o nangbaengane… hehehe… jeba ong∙bo mahari gipinko mande ra∙ani kattarangba donga aro mahari apsanko mande ra∙ani kattarangba dingtang donga. Haida saoba aganaba donga, ‘Hetchala, ia chasong gitalode ong∙aria maia manko rakkinara. Mahari gipinko ada ba abi okamnara kra∙ariaba’, innenba. Uandake okamna kragenchimode, mingsako janapna namniksara: “Badiaba chasongo, mande ra∙ani chin gita pagipatangko mosa ra∙o kranikgenma?” Bebean mitamrang chasongni kri dingtanga, indiba mitamrangde chasongantian dingtangna man∙ja. Skang chasongonian rong gitchakko gitchak minga, ia chasongo rong gitchakko tangsek mingoara kranikgenma? Sakprakni aganchakanian ‘Krajawa’ ong∙gen. Ia seaniara skatang ong∙gija okamaniko chonnikna mangsonge ong∙ja indiba jattangna ka∙saeanba ku∙bewalko tangkame ripinganinasa.

Ama-Appa channanirangoba maidake atchu ambirang mingbaaha, uko ripinganian jatni mikkim rasong aro ku∙sikko tangkame rakkiangani ong∙a. Ia okambewalan jatni nokdangni ku∙bewal ong∙a. Nokdangni ku∙bewalko gimaatode, gamchatgipa jattangni gamjinko gimaatanian ong∙a. Gonggiangenggipa bewalko hai an∙ching damsan ja∙ku de∙enba dimbrengataina. An∙ching sakprakni jakoan.

Aldubate ma∙sidapna gita FlowChart-rangko niangpa∙bo.